टिप्पणी: ६−(पाकः) इण्भीकापा०। उ० ३।४३। पा रक्षणे पा पाने वा-कन्। यद्वा, डुपचष् पाके-घञ्। रक्षणीयो बालकः। ब्रह्मचर्यादितपसा परिपचनीयोऽहम्-दयानन्दः (पृच्छामि) जिज्ञासे (मनसा) मननेन सह (अविजानन्) न विजानन् (देवानाम्) दिव्यानां विदुषाम् (एना) एनानि (निहिता) स्थापितानि (पदानि) पदचिह्नानि। पत्तुं प्राप्तुं ज्ञातुं योग्यानि-द० (वत्से) वृतॄवदिवचिवसि०। उ० ३।६२। वस निवासे-स प्रत्ययः निवासे संसारे। अपत्ये-द० (बष्कये) वलिमलितनिभ्यः कयन्। उ० ४।९९। वष्क गतौ दर्शने च-कयन्। गन्तव्ये। द्रष्टव्ये-द० (अधि) अधिकम् (सप्त) (तन्तून्) तन्तुरूपाणि त्वचादिसप्तेन्द्रियाणि (वि) विविधम् (तत्निरे) लिटि छान्दसं रूपम्। तेनिरे। विस्तारितवन्तः (कवयः) मेधाविनः (ओतवै) तुमर्थे सेसेनसे०। पा० ३।४।९। वेञ् तन्तुसन्ताने-तवै। वातुम्। विस्ताराय-द० (उ) वितर्के ॥