टिप्पणी: ३−(इमम्) दृश्यमानम् (रथम्) म० २। रंहणशीलं विमानादितुल्यं वा देहम् (अधि तस्थुः) लटः स्थाने लिट्। आरोहन्ति (सप्त) त्वचानेत्रादीन्द्रियाणि (सप्तचक्रम्) चक्रं व्याख्यातम्-म० २। चक्रवत् त्वचानेत्रादिसप्तेन्द्रियाणि यस्मिन् तच्छरीरम् (सप्त) (वहन्ति) चालयन्ति (अश्वाः) व्यापनशीलानि त्वचानेत्रादीन्द्रियाणि। (सप्त) (स्वसारः) अ० ६।१००।३। स्वसा सु असा स्वेषु सीदतीति वा-निरु० १०।१३। सावसेर्ऋन्। उ० २।९६। सु+असु क्षेपणे, यद्वा, अस गतिदीप्त्यादानेषु−ऋन्। सुष्ठु गन्त्र्यः। यद्वा, स्व+सारयतेः−क्विप्। स्वस्य शरीरस्य सारयित्र्यश्चालयित्र्यः। परस्परं भगिनीभूता वा त्वचानेत्रादयः (अभि) सर्वतः (सम् नवन्त) अ० ५।५।२। संनवन्ते। संगच्छन्ते (यत्र) यस्मिन् हृदयाकाशे (गवाम्) इन्द्रियाणाम् (निहिता) धृतानि (सप्त) (नाम) नामन्सीमन्०। उ० ४।१५१। णम प्रह्वत्वे शब्दे च-मनिन्, धातोर्मलोपो दीर्घश्च। नामानि। नमनानि। स्पर्शरूपशब्दरसगन्धमननज्ञानरूपाणि आकर्षणानि ॥