टिप्पणी: ४−(यस्य) पुरुषस्य (आञ्जन) हे सम्यक् संसारस्य व्यक्तिकारक ब्रह्म (प्रसर्पसि) प्रकर्षेण व्याप्नोषि (अङ्गमङ्गम्) प्रत्येकमङ्गम् (परुष्परुः) अर्त्तिपॄवपि०। उ० २।११७। इति पॄ पालनपूरणयोः-उसि। प्रत्येकपरुः। प्रत्येकग्रन्थिम् (ततः) तस्मात् पुरुषात् (वि बाधसे) विविधं निवारयसि (यक्ष्मम्) अ० २।१०।५। राजरोगम्। क्षयम् (उग्रः) उद्गूर्णबलः। प्रबलः (मध्यमशीः) क्विप् च। पा० ३।२।७६। इति मध्यम+शीङ्-क्विप्। मध्यदेशे शेते वर्तते सः। वादिप्रतिवादिनोर्वाक्यादिविषयविमर्शपूर्वकं तत्त्वनिर्णायकः। मध्यवर्त्ती। मध्यस्थः (इव) यथा ॥