टिप्पणी: २−(यः) प्रजापतिः कः (प्राणतः) अन प्राणने-शतृ। प्रश्वसतः। चेतनस्य (निमिषतः) मिष स्पर्धायाम्-शतृ। तुदादित्वात् शः। निमेषणं निमीलनं चक्षुर्मुद्रणं कुर्वतः। अचेतनस्य (महित्वा) सर्वधातुभ्य इन्। उ० ४।११८। इति मह पूजायाम्-इन्। महेर्महतो भावो महित्वम्। यद्वा। अन्येभ्योऽपि दृश्यन्ते। उ० ४।१०५। इति मह-भावे इत्वन्। सुपां सुलुक्०। पा० ७।१।३९। इति तृतीयाया आकारः। महित्वेन। महत्त्वेन (एकः) अद्वितीयः (राजा) शासकः अधिपतिः (जगतः) संसारस्य (बभूव) (यस्य) कस्य। प्रजापतेः (छाया) माछाशसिभ्यो यः। उ० ४।१०९। इति छो छेदने-य, टाप्। गृहनाम-निघ० ३।४। आश्रयः, इत्यर्थः। कान्तिः प्रकाशः। प्रतिबिम्बम्। प्रकाशावरणम् अज्ञानमित्यर्थः। यद्वा। छायेव अनुगामी वशीभूतः (अमृतम्) भावे-क्त। अमरणम्। जीवनम्। जीवनसाफल्यम् (यस्य) यस्यच्छाया (मृत्युः) मरणम्। जीवनवैफल्यम्। अन्यद् गतम्। म० १ ॥