टिप्पणी: ४−(सः) प्रसिद्धः (हि) अवश्यम् (दिवः) द्युलोकस्य। सूर्यस्य (सः) षो अन्तकर्मणि-ड। स्यति नाशयति दुष्टानिति सः। विष्णुः। ईश्वरः। शिवः। (पृथिव्याः) भूलोकस्य (ऋतस्थाः) अञ्चिघृसिभ्यः क्तः। उ० ३।८९। इति ऋ गतौ, हिंसने च-क्त। ऋतं सत्यनाम-निघ० ३।१०। उदकम्-निघ० १।१२। आतो मनिन्क्वनिब्वनिपश्च। पा० ३।२।७४। इति ऋत+ष्ठा गतिनिवृत्तौ-विच्। ऋते सत्ये कारणे स्थितः। कारणस्य कारणमित्यर्थः। (मही) मह पूजायाम्-क्विप्। इयाडियाजीकाराणामुपसंख्यानम्। वा० पा० ७।१।३९। इति ईकारो विभक्तौ। महत्यौ। विशाले। (क्षेमम्) अ० ३।३।५, कुशलम्। (रोदसी) सर्वधातुभ्योऽसुन्। उ० ४।१८९। इति रुधेरसुन्। धस्य दकारः, उगितश्च। पा० ४।१।६। इति ङीप्। वा छन्दसि। पा० ६।१।१०६। इति पूर्वसवर्णः। आभ्यां हि रुद्धानि सर्वभूतानि। रोदस्यौ। द्यावापृथिव्यौ-निघ० ३।३०। (अस्कभायत्) स्कन्भु गतिप्रतिबन्धे-लङ्। छन्दसि शायजपि। पा० ३।१।८४। इति श्नः शायच्। अस्कभ्नात्। स्थापितवान् (महान्) विशालः (मही) पूर्ववत्। महत्यौ। (वि) पृथक्-पृथक् (जातः) प्रादुर्भूतः। (द्याम्) अ० १।२।४। द्योतमानं सूर्यात्मकम् (सद्म) सर्वधातुभ्यो मनिन्। उ० ४।१४५। इति षद्लृ विशरणगत्यवसादनेषु-मनिन्। संग्रामनाम-निघ० २।१७। गृहनाम-निघ० ३।४। उदकनाम-निघ० १।१२। सदनम्। गृहम्। (पार्थिवम्) अ० २।२८।३। भौमम् (रजः) भूरञ्जिभ्यां कित्। उ० ४।२१७। इति रञ्ज रागे-असुन्। रजो रजतेर्ज्योती रज उच्यते उदकं रज उच्यते लोका रजांस्युच्यन्तेऽसृगहनी रजसी उच्येते-निरु० ४।१९। लोकम् ॥