टिप्पणी: ३−(नीचैः) अवाङ्मुखाः। (पद्यन्ताम्) पतन्तु। (अधरे) निकृष्टाः। पादाक्रान्ताः। (नः) अस्माकम्। (सूरिम्) सूङः क्रिः। उ० ४।६४। इति षूङ् प्रसवे, वा षू प्रेरणे-क्रि। सूते अर्थान्। सुवति शत्रून्। शूरम्। राजानम्। पण्डितम्। (मघवानम्) मघम्=धनम्। निघ० २।१०। मत्वर्थीयो वनिप्। प्रभूतधनवन्तम्। (पृतन्यान्)। सुप आत्मनः क्यच्। पा० ३।१।८। इति पृतना-क्यच्। कव्यध्वरपृतनस्यर्चि लोपः। पा० ७।४।३९। इति क्यचि पृतना-शब्दस्य अन्त्यलोपः। लेटि आडागमः। पृतन्यन्तु पृतनां सेनाम् आत्मन इच्छन्तु। (क्षिणाम्) क्षि हिंसायाम्। नाशयामि। (ब्रह्मणा) वेदज्ञानेन। शास्त्रबोधेन। (अमित्रान्) अ० १।१९।२। पीडकान्। (उत् नयामि) उन्नतान् करोमि। (स्वान्) स्वकीयान् वीरान्। (अहम्) सेनापतिः ॥