टिप्पणी: ३−(धरुणी)। कॄवृदारिभ्य उनन्। ड० ३।५३। इति धृञ्-उनन्। ङीप्। भोगजातस्य धारयित्री। (शाले)। (बृहच्छन्दाः)। चन्देरादेश्च छः। उ० ४।२१९। इति बृहत्+चदि आह्लादे-असुन्। चस्य छः। यद्वा। छदि आच्छादने-असुन्। प्रभूताच्छादना। महद्भिश्छन्दोभिर्वेदमन्त्रैरुपेता। (पूतिधान्या)। क्तिच्क्तौ च संज्ञायाम्। पा० ३।३।१७४। इति पूञ् शोधे-क्तिच्। पूतीनि पवित्राणि धान्यानि यस्यां सा तथोक्ता। शुद्धधान्ययुक्ता। (वत्सः)। वृतॄवदिवचिवसि०। उ० ३।६२। इति वद कथने-स प्रत्ययः। वदतीति वत्सः। (आगमेत्)। आगच्छेत्। (आ)। समुच्चये। (कुमारः)। कमेः किदुच्चोपधायाः। उ० ३।१३८। इति कम इच्छायाम्-आरन्। (यद्वा)। कुमार क्रीडायाम्-अच्। कमनीयः क्रीडको वा। बालकः। (आ)। आगच्छेयुः। (धेनवः)। दोग्ध्र्यो गावः। (सायम्)। सयंकाले। (आस्पन्दमानाः)। स्पदि ईषाकम्पे शानच्। कूर्दमानः। क्रीडां कुर्वाणाः ॥