टिप्पणी: ३−(सहस्राक्षेण)। सहस्रम् बहुनाम-निघ० ३।१। सहो बलम्-निघ० २।९। रो मत्वर्थीयः। सहस्रं सहस्वत्-निरु० ३।१। बहुव्रीहौ सक्थ्यक्ष्णोः स्वाङ्गात् षच्। पा० ५।४।११३। इति षच्। सहस्रं बहूनि अक्षीणि चक्षूंषि दर्शनशक्तयो यस्य तेन तथोक्तेन। (शतवीर्येण)। शतम्। शो तीक्ष्णीकरणे-डतच्। बहुनाम। निघ० ३।१। शतं दशदशतयः-निरु० ३।१०। बहुसामर्थ्योपेतेन। (शतायुषा)। बहुजीवनसाधनयुक्तेन। (हविषा)। आत्मदानेन। भक्त्या। (आ अहार्षम्)। हृञ् हरणे-लुङ् समन्ताद् अनैषम्। उन्नीतवानस्मि। (एनम्)। आत्मानम्। देहिनम्। (इन्द्रः)। प्रतापी जीवः। (यथा)। येन प्रकारेण। (शरदः)। कालाध्वनोरत्यन्तसंयोगे। पा० २।३।५। इति द्वितीया। शतं शरदः संवत्सरान्। (नयाति)। णीञ् प्रापणे लेटि आडागमः। नयेत्। प्रापयेत्। (अति)। अतीत्य। (विश्वस्य)। सर्वस्य। प्रत्येकस्य। (दुरितस्य)। अ० २।६।५। पापस्य। कष्टस्य। (पारम्)। पार कर्मसमाप्तौ-अच्। तीरम्। अन्तम् ॥