टिप्पणी: २–जठरम्। जायते गर्भो मलं वा अस्मिन्निति जठरः। जनेररष्ठ च। उ० ५।३८। इति जन जननप्रादुर्भावयोः–अर, नस्य ठः। अथवा, जटति एकत्री भवति अन्नादिकमत्र। जट संहतौ–अर, टस्य ठः। उदरम्। नव्यः। नूयते स्तूयत इति। अचो यत्। पा० ३।१।९७। इति णु स्तुतौ–यत्। यद्वा, नव एव। स्वार्थे यत्। नूतनः। स्तुत्यः। न। उपमार्थे। अग्निर्न ये भ्राजसा, अग्निरिव–निरु० ३।१५। इव। यथा। पृणस्व। पृण तृप्तीकरणे। तर्पय। पूरय। मधोः। तृतीयार्थे षष्ठी। मधुररसेन। दिवः। स्वर्गस्य। अत्यानन्दस्य। सुतस्य। म० १। तत्त्वस्य। स्वर्। अव्ययं व्याहृतिविशेषश्च। अन्येभ्योऽपि दृश्यन्ते। पा० ३।२।७५। इति सु+ऋ गतौ–विच्। यद्वा। स्वृ शब्दोपतापयोः–विच्। स्वरादित्यो भवति सु अरणः सु ईरणः स्वृतो रसान् स्वृतो भासं ज्योतिषां स्वृतो भासेति वा–निरु० २।१४। स्वर्गे आनन्दविशेषे वर्त्तमानम्। मदाः। मदि स्तुतिमोदमदस्वप्नकान्तिगतिषु–अच्। आमोदाः। हर्षाः। सुवाचः। शोभना वाचा येषां ते। शोभनस्तुतियुक्ताः। अगुः। इण् गतौ–लुङ्। इणो गा लुङि पा० २।४।४९। गतवन्तः। प्राप्तवन्तः ॥