टिप्पणी: २–सोमजुष्टम्। अर्त्तिस्तुसुहु०। उ० १।१४०। इति षु प्रसवैश्वर्ययोः–मन्। जुषी प्रीतिसेवनयोः–क्त। ऐश्वर्यवद्भिः प्रीतम्। ब्रह्मजुष्टम्। बृंहेर्नोऽच्च। उ० ४।१४६। इति बृहि वृद्धौ–मनिन्, नस्य अकारः। ब्रह्मभिः अधीतवेदैर्ब्राह्मणैर्ब्रह्मज्ञानिभिः सेवितम्। अर्यम्णा। अ० १।११।१। अर्यमादित्योऽरीन् नियच्छति–नि० ११।२३। श्रेष्ठाणां मानकर्त्रा, न्यायकारिणा राज्ञा। सम्भृतम्। सम्यक् पोषितं वर्धितम्। भगम्। पुंसि संज्ञायां घः प्रायेण। पा० ३।३।११८। इति भज सेवायाम्–घ। चजोः कु घिण्ण्यतोः। पा० ७।२।५२। इति जस्य गः। भजनीयम्। सेवनीयम्। ऐश्वर्ययुक्तम्। धातुः। सर्वस्य धारकस्य पोषकस्य। देवस्य। प्रकाशमयस्य परमेश्वरस्य। सत्येन। सते हितम्, सत्–यत्। यथार्थधर्मेण। कृणोमि। करोमि। पतिवेदनम्। विद्लृ लाभे, विद ज्ञाने–ल्युट्। वेदनम्=विवाहः। ज्ञानम्। पुमान् स्त्रिया। पा० १।२।६७। इति पत्नी च पतिश्च पती तयोर्वेदनं लाभं ज्ञानं विवाहं वा ॥