टिप्पणी: २–दृष्टम्। दृष्टिगोचरम्। स्थूलशरीरयुक्तम्। अदृष्टम्। अगोचरम्। सूक्ष्मकायम्। अस्माकं शरीरान्तः स्थितं वा। अतृहम्। तृह हिंसायाम्–छन्दसि लुङि च्लेरङ्। नाशितवानस्मि। अथो। अथ+उ। अपि च। कुरूरुम्। कु–रुरुम्। कु शब्दे, आर्त्तस्वरे–डु। कवन्ते शब्दयन्ति प्राणिनो यत्र सा कुः पृथिवी। कुवन्ते आर्त्तस्वरं कुर्वन्ति यस्मात् कु पापम्, कुत्सा। रुशातिभ्यां क्रुन्। उ० ४।१०३। इति रुङ् गतौ वधे, वा रु ध्वनौ–क्रुन्। छान्दसो दीर्घः। कौ भूमौ रवते गच्छतीति कुरुरुः। यद्वा, कुत्सितं रवते हिनस्ति, वा रौति ध्वनयतीति कुरुरुः। भूमिगन्तारम्। कुहिंसकम्। कुत्सितध्वनियुक्तं कीटम्। अल्गण्डून्। अल्–गण्डून्। अल पर्याप्तौ–क्विप्। भृमृशीङ्०। उ० १।७। इति गडि कपोलविषयक्रियायाम्–उ। गण्डयते शिरोभागः स्थाप्यतेऽत्रेति गण्डुः। उपधानम्। अलन्ति पर्याप्ता भवन्ति गण्डुषु, उपधानेषु ये तान्। सर्वान्। निःशेषान्। शलुनान्। कॄवृदारिभ्य उनन्। उ० ३।५३। इति शल वेगे–उनन्। शीघ्रगतीन्। क्रिमीन्। म० १। कीटान्। वचसा। वच कथने–असुन्। वचनेन। कथनेन। वचनमात्रेण, अतिशीघ्रम्। ओषधिशौचादिहितकथनेन–ओ३म्, गायत्र्यादिजपेन–रोचककथा–निद्रागीतादिवर्णनेन–इत्येवमर्थाः। जम्भयामसि। जभि नाशे, नाशने च। रधिजभोरचि। पा० ७।१।६१। इति नुम्। जम्भयामः। नाशयामः ॥