टिप्पणी: ३–पिता। म० २ पालयिता। जनिता। जनी जनने–णिचि तृच्। जनिता मन्त्रे। पा० ६।४।५३। इति तृचि णिलोपो निपात्यते। जनयिता। उत्पादकः। बन्धुः। शॄस्वृस्निहि०। उ० १।१०। इति बन्ध बन्धने उ प्रत्ययः, स च नित्। ञ्नित्यादिर्नित्यम्। पा० ६।१।१९१। इति नित्त्वाद् आद्युदात्तः, प्रेम्णा बध्नातीति। बान्धवः। धामानि। म० २। धामानि त्रयाणि भवन्ति स्थानानि नामानि जन्मानीति–निरु० ९।२८। जन्मस्थाननामानि। वेद। म० १। वेत्ति। भुवनानि। भूसूधूभ्रस्जिभ्यश्छन्दसि। उ० २।८०। इति भू सत्तायाम्–क्युन्। सर्वपदार्थाधिकरणानि। लोकान्। देवानाम्। दिवु पचाद्यच् पृथिव्यादिदिव्यपदार्थानाम्। नामधः। नाम+धाञ् धारणे–क। नामकरणकर्ता, नामधारकः। एकः। इण्गतौ–कन्। अद्वितीयः। असहायः। सम्प्रश्नम्। सम्यक् पृच्छन्ति यस्मिँस्तम्। परमात्मानम्। यथाविधि। प्रश्नीयम्। अन्वेषणीयम्। भुवना। भुवनानि। लोकाः। यन्ति। इण् गतौ–लट्। गच्छन्ति, प्राप्नुवन्ति। लभन्ते ॥