टिप्पणी: ३०−(श्राम्यतः) श्रमु तपसि खेदे च-शतृ। शमामष्टानां दीर्घः श्यनि। पा० ७।३।७४। इति दीर्घः। तप्यमानस्य ब्रह्मचारिणः (पचतः) डुपचष् पाके-शतृ। परिपक्वस्य। दृढनिश्चयस्य (विद्धि) ज्ञानं कुरु (सुन्वतः) षुञ् पीडने-शतृ। तत्त्वस्य पीडनं मन्थनं कुर्वतः पुरुषस्य (पन्थाम्) मार्गम् (स्वर्गम्) सुखप्रापकम् (अधि) उपरि (रोहय) आरोहय, स्थापय (एनम्) जीवम् (येन) पथा (रोहात्) रोहेत्। अधितिष्ठेत् (परम्) उच्चम् (आपद्य) प्राप्य (यत्) (वयः) सर्वधातुभ्योऽसुन्। उ० ४।१८९। वी गतिव्याप्तिप्रजनकान्त्यसनखादनेषु, यद्वा वय गतौ-असुन्। वयः=अन्नम्-निघ० २।७। जीवनम् (उत्तमम्) (नाकम्) सुखस्वरूपम् (परमम्) सर्वोत्कृष्टम् (व्योम) वि+अव-मनिन्। व्योमन्-व्यवने-निरु० ११।४०। विविधं रक्षकम्, ओ३म्, इति संज्ञकं परब्रह्म ॥