टिप्पणी: ४−मधोः। म० १। मधुररसात्, क्षौद्ररसात्। अस्मि। अहं भवानि। मधु-तरः। द्विवचनविभज्योपपदे तरबीयसुनौ। पा० ५।३।५७। इति मधु+तरप्। अधिकमाधुर्योपेतः। मदुघात्। मोदकात्। मुद हर्षे−ण्वुल्। छान्दसं रूपम् मिष्टखाद्यविशेषात्। यद्वा [मधुकात्] मधु+कै−क। मधु मधुरं कायति शब्दयति विज्ञापयतीति मधुकम्। यष्टिमधुकायाः, ओषधिविशेषात्। सायणभाष्ये तु (मदुघात्)=मधुदुघात्, मधु+दुह प्रपूरणे−कप्, घत्वं च, मधु−शब्दे धुलोपश्छान्दसः, मधुस्राविणः पदार्थविशेषात्−इति वर्तते। मधुमत्−तरः। मधु+मतुप्+तरप् पूर्ववत्। पा० ५।३।५७। अधिकतरमधुमान्, उपकारितरः। माम्। विद्यार्थिनं ब्रह्मचारिणम्। किल। प्रसिद्धौ, निश्चयेन। त्वम्। विद्ये। वनाः। वन संभक्तौ−लेट्। लेटोऽडाटौ। पा० ३।४।९४। इति आडागमः। त्वं संभजेः, सेवस्व, कामयेथाः। शाखाम्। शाख व्याप्तौ−अच्, टाप्। वृक्षाङ्गविशेषम्। मधुमतीम्। म० १। मधु+मतुप्−ङीप्। मधुररसयुक्ताम् ॥