टिप्पणी: ४−शीताय। श्यैङ्। गतौ-क्त। द्रवमूर्त्तिस्पर्शयोः श्यः। पा० ६।१।२४। इति सम्प्रसारणम्। हलः। पा० ६।४।२। इति दीर्घः। शीतलाय। शीतस्पर्शवते। तक्मने। म० १। कृच्छ्रजीवनकारिणे रोगाय, ज्वराय ज्वरसमानाय परमेश्वराय। रूराय। स्फायितञ्चिवञ्चिशकि०। उ० २।१३। इति रुङ् बधे-रक्, दीर्घश्च। घातकाय, पीडकाय, क्रूराय। शोचिषे। म० २। तापकराय। कृणोमि। कृवि हिंसाकरणयोः। करोमि। यः। तक्मा, ज्वरः। अन्येद्युः। अव्ययम्। अन्यस्मिन् दिने, परदिने। उभयद्युः। अव्ययम्। उभयस्मिन् द्वितीयेऽहनि। अभि-एति। आगच्छति। तृतीयकाय। त्रेः सम्प्रसारणं च। पा० ५।२।५५। इति त्रि-तीयः पूरणे, संप्रसारणं च। स्वार्थे कन्। तृतीयदिने आगच्छते ॥