टिप्पणी: १−अमा-वास्याम्। अमा+वस निवासे−घञ्। अमा साहित्येन चन्द्रार्कयोर्वासो यत्र। षिद्गौरादिभ्यश्च। पा० ४।१।४१। इति ङीष्। उदात्तस्वरितयोर्यणः स्वरितोऽनुदात्तस्य। पा० ८।२।४। इति स्वरितः। अमावस्यायां रात्रौ, महान्धकारे। रात्रिम्। राशदिभ्यां त्रिप्। उ० ४।६७। इति रा दानग्रहणयोः−त्रिप्, ददाति विश्रामं, गृह्णाति श्रमं च। कालाध्वनोरत्यन्तसंयोगे। पा० २।३।५। इति द्वितीया। रजनीम्। निशाकाले। उत्-अस्थुः। ष्ठा गतिनिवृत्तौ-लुङ्। उत्थितवन्तः, संचरणं कृतवन्तः। व्राजम्। तस्य समूहः पा० ४।२।३७। इति व्रज−अण् समूहे, नपुंसकत्वम्। गोष्ठसमूहम्। अथवा। क्रियाविशेषणम्। व्रजः=समूहः−अण्। अतिसमूहेन। अत्रिणः। १।७।३। अदनशीलाः, स्वार्थिनः, उदरपोषकाः। अग्निः। १।६।२। अग्निवत् तेजस्वी राजा। तुरीयः। तुरो वेगः। घच्छौ च। पा० ४।४।११७। इति तुर−छः प्रत्ययः, तत्र भव इत्यर्थे। वेगवान्। यातुहा। कृवापाजिमि० उ० १।१। इति यत ताडने−उण्। यातयतीति यातुः, राक्षसः। बहुलं छन्दसि। पा० ३।२।८८। इति यातूपपदे हन हिंसागत्योः−क्विप्। राक्षसघातकः। दुष्टनाशकः। अधि। अधिकृत्य, स्वामित्वेन। ब्रवत्। ब्रूञ् व्यक्तायां वाचि-लेट्। ब्रूयात् ॥