टिप्पणी: ५−वि+भिनद्मि। भिदिर् विशेषकरणे, द्विधाकरणे च। मलात् पृथक् करोमि, विश्लेषयामि। मेहनम्। १।३।७। गर्भमार्गम्। वि=विभिनद्मि। एवं (वि) इति शब्देन सह सर्वत्र योजनीयम्। योनिम्। म० ३। गर्भाशयम्। गवीनिके। १।३।६। पार्श्ववर्तिन्यौ नाड्यौ। मातरम्। १।२।१। मान्यते पूज्यते सा माता। जननीम्। पुत्रम्। पुवो ह्रस्वश्च। उ० ४।१६५। इति षूङ् शोधे-क्त्र। ह्रस्वश्च धातोः। पुनाति पित्रादीनिति पुत्रः। पुत्रः पुरुत्रायते निपरणाद्वा पुं नरकं ततस्त्रायत इति वा-इति यास्कः, निरु० २।११। पुरु+त्रैङ् रक्षणे-ड। यद्वा, पुत्+त्रैङ्-ड। यथा च रामायणे। २।१०७।१२।पुन्नाम्नो नरकाद् यस्मात् पितरं त्रायते सुतः। तस्मात् पुत्र इति प्रोक्तः पितॄन् यः पाति सर्वतः ॥ अपत्यम्। सन्तानम्। कुमारम्। कुमार क्रीडने-अच्। क्रीडाशीलम्। शिशुम्। जरायुणा। म० ४। गर्भवेष्टनचर्मणा। अन्यत् गतम्−म० ४।