टिप्पणी: ४−न-इव। इव अवधाने। नैव। मांसे। मनेर्दीर्घश्च। उ० ३।६४। इति मन ज्ञाने धृतौ च सप्रत्ययः, दीर्घश्च। रक्तजधातुविशेषे। न। निषेधे। पीवसि। सर्वधातुभ्योऽसुन्। उ० ४।१८९। इति पीव स्थौल्ये-असुन्। ञ्नित्यादिर्नित्यम्। पा० ६।१।१९७। इति नित्त्वाद् आद्युदात्तः। स्थूलत्वे। मज्जसु। श्वनुक्षन्पूषन्०। उ० १।१५९। इति मस्ज जलान्तःप्रवेशे-कनिन्, निपात्यते च। अस्थिमध्यस्थस्नेहेषु। आ-हतम्। आङ्+हन वधे गतौ च-क्त। संबद्धम्। अव। अवाक्, अधस्तात्। एतु। गच्छतु पततु। पृश्नि। घृणि−पृश्नीति। उ० ४।५२। इति स्पृश स्पर्शे-नि, सलोपः। स्वल्पम्। शेवलम्। शीङो धुक्लक्वलञ्वालनः। उ० ४।३८। इति शीङ् शयने-वालन्, ह्रस्वो वा। नित्त्वाद् आद्युदात्तः। जलस्योपरिस्थतृणविशेषः, शेवालं शैवलं वा। तद्वत् जननीजठरे स्थितं जरायु। शुने। श्वनुक्षन्पूषन्। उ० १।१५९। इति श्वि गतौ-कनिन्। कुक्कुराय। जरायु। किंजरयोः श्रिणः। उ० १।४। इति जरा+इण् गतौ-ञुण्। गर्भवेष्टनचर्म। उल्वम्। मांसपिण्डश्च यः प्रजननानन्तरं निःसरति। अत्तवे। तुमर्थे सेसेन्०। पा० ३।४।९। इति अद भक्षणे−तवेन् प्रत्ययः। भक्षितुम्। पद्यताम्। पद गतौ दिवादित्वात् श्यन्। नित्यवीप्सयोः। पा० ८।१।४। इति नित्यतायां पुनः कथनम् गच्छतु, पततु ॥